يا جماعه انا اتخنات

من شويه أيام كتااار قال السيد احمد نظيف إن مصر ليست للبيع ..... و رطلين كلام من اللي هما مصر هي امي نيلها جوه دمي

بعد شويه مش كتااار اعلن عن عدم تراجع الحكومه في صفقة بيع بنك القاهرة ( 80% من الاسهم ) ..
.
ايضا يتم تحضير مشروع قرار في مجلس الشعب لجعل قطاع التأمين الصحي قطاع استثماري
كلام كلام

يبقا هيا حاجه من الاتنين

يا تبنوا لهم البيوت
يا توفروا لهم الكوله





______________________________________________



أجمل حاجه في السينما الصيفي طبعا بعد الهوا اللذيذ اللي بيلفح في قفاك من اول الساعه 10 بالليل لغايه 4 الفجر
خصوصا لو كنت على ارتفاع 15 متر من سطح البحر
أجمل حاجه ان السينما تقريبا بتكون كلها بنات
يعني مووووووووووز
خصوصا بقا لو كان فيلم للواد الحليوه احمد عز
اول مشهد في فيلم الشبح close على وش احمد عز و عنيه

ودا دفع بنت قاعده بعدي بصفين انها تصيح في جرأه و قوه ووسط عشرات المشاهدين
بعد ما السينما بدأت تصفصصف خصوصا ان الساعه كانت 2:30 بالليل

و قالت
يخرب بيت جمال عنين امك
اه و الله بجد

و طبعا فشلت كل محاولات رجال الامن و المطافي و الناس في السينما انهم يهدوني
و اخترقت الجموع وسط دهشة الجميع و انا رايح للبنت و الكل متوقع اني هالطشها بالكف اسور و دانها الاتنين
لكن
و قلت لها
مش عارفين ننام يا بنتي وطي صوتك شويه
ودا لان الفيلم ممل جدا خصوصا انه مسروق من فيلم اسمه
bourne identity
ودا يرجعنا لسلسه افلام مسروقه في الفتره الاخيره زي
ملاكي اسكندريه final analysis
جاءنا البيان التالي
محطة مصر
الرجل الابيض المتوسط
امير الظلام


و غيرهم كتير



ياحرامية



____________________________________________




من الأمور المعروفة ان الريس او حاكم البلد طول ماهو عايش بيكون
كل واحد بيتكلم و حاطط ايده على كفنه و خايف و مرعوب من زنزانه ولا كرباج ولا حتى قلم على الافا
لما الناس في مصر بتعمل كدا و بتشتم و بتستعجل موت الريس و هو عايش و حي يرزق
فمن المؤكد ان بعد موته هيكون السبيل الوحيد للتعبير عن العرفان بالجميل من جانب الشعب المصري للريس انهم هيحولوا قبره مبوله عامه


_____________________________________________



بما اننا شعوب تعشق التصنيفات و الاحزاب و الجماعات
و كل حاجه عندنا طوائف و ملل
دين سياسه كوره كلها طوائف و ملل

حتى الغناء بقا دلوقتي فرق
و مشجعين
و ظهرت الطائفة الديابيه اللي كل همها في الدنيا تشجع و تناصر و تتابع و تشد من ازرار و ياقات قمصان عمرو دياب

على الجانب الاخر هناك الطائفه التيموريه
اللي فاضل لهم شويه و يعملوا لتامر حسني تمثال و يحجوا عنده

بكره نشوف خناقات و شتايم بين جمهور الطائفتين
و مش بعيد يعملوا ماتشات ملاكمه بينهم و يجيبوا حكام من بره
ناس طيبين اوووي



______________________________________________


مش عارف الناس هتحترم نفسها و تحترم عقل الناس اللي قدامها امته

الحج خالد الغندور في برنامج الكوره مع دريم قال نصا ً ..
و سجل هدف حرس الحدود نجم النادس الاهلي السابق وائل رياض شيتوس ..
و بعدها فوراً قال ... سؤال حلقة اليوم
في أي نادي كان يلعب النجم وائل رياض قبل انتقاله الي نادي حرس الحدود ..

يبقا الاجابه برضوا حاجه من الاتنين

يا تبنوا لهم البيوت
يا توفروا لهم الكوله